आतां तरि सोडी  रे ! हा संग । जनिं वनिं हो नि:संग - धृ.

विषयसंयोगें धरिसी सोंग । दु:खेंंचि होसी दंग ।
अभ्र सावुलीं जेविं बाहुली । बेगडिचा हा रंग - 1

परनारीशीं करूनि उपरती । आवरिं हा कीं अनंग ।
ब्रह्मरसाचे भावनेविण । रजतमें होय जीव वंग - 2

योगाभ्यासें करूनी साधीं । बैठक पवन तुरंग ।
धांवे जेथ कीं तेथ धरावा । हा मन चपल कुरंग -3

नसोनि दिसतें केवळ जग हें । मृगजळिंचे किं तरंग ।
चिद्भानु हा कारण आत्मा । पहा तूं कीं अंतरंग -4

म्हणे सोहिरा निर्गुण ध्यानीं नये तरि, । स्मरिं सांवळि मूर्ति सुरंग ।
वैकुंठपति हा व्यापक विष्णु । अवघाचि कीं श्रीरंग - 5